Inta
nóstra uiza purtróppu nu gh’è de fiummi, ma sulu picin canè
che sgùran quande ciöve, e bezögna che ciöve ‘n bellu po’,
dunca en sciüti che nu ghe pö vive mancu i bâgetti.
U re di
canè tabarchin u l’è de següu u Canò du Geniò. Stu canò u l’è
u ciü vixin au Pàize, infatti u passe pai Funtaňe, dóppu avài
fetu in bellu sotu dai porte de Rumbu, e u finisce in mò intu
pórtu.
U Canò du
Geniò u l’ha seguìu a stória di Pàize, infatti intu 1700 u
sguriva ancun unde àua l’è via XX Settembre ch’a fa quéll’angulu
próppiu perché u l’éa u camin du canò.
Cresciüu u pàize, anche
lé u l’ha duvüu spustose deré â cinta, ch’a pasova alùa de ‘n
via Rumma, dunde àua gh’è via Bruno Danero. Anche lì u dova
destürbu, pe quéstu primma g’han fetu i puntétti suvia e àua
l’han cuertu du tüttu.
Otri
canè, ménu famuzi, sun: u canò de Gagge, de Pitichéddu, u canò
du Bacciu, quéllu du Maciun, de Guidi, da Sepurtüa e otri.
Anche cui
stagni sémmu inti guoi: o de stè en sciüti o gh’areste giüstu
quélla stissa d’egua ch’a l’abaste pe foghe vive e sinsòie, e
cumme pùnzan sé, po’ che t’àggian dichiaràu guera sensa che ti
ti ne sacci ninte.
I stagni
ciü grendi sun: u stagnu de Câvinogra, quéllu du Sabin, u
stagnu da Vivaňa, quéllu di Pescétti, che de següu u l’è
u ciü
cunusciüu perché gh’è dau lau a stradda ch’a pórte ai spiagge.
U stagnu
di Pescétti u l’è stetu bunificàu e u l’aspéte de savài che
fin u faiò, vistu che sta distàiza de teren, cuscì bell’averta,
a fa gua à tanti.
Anche e
saliňe éan stagni; en steti orientè pe st’üzu, tantu
impurtante pe l’ecunumia tabarchiňa, fiňa dai primmi tempi, ma
àua sun abandunè e s’ai göde i ôxélli che vìvan inte l’egua,
ghe màngian, ghe dòrman, sciòrian, certi ghe fan u niu e
‘ntantu fan ciü belli sti stagni, perché quande dòrman in sce
‘na gamba sula, pòian de sciue sbucè inte l’egua so.
